Дафтари матбуоти Додгоҳ рӯзи 19-уми август хабар дод, ки Лутфуллои Назирмад, Ҷумъахон Қурбонов, Ёқубҷон Юсуфзода ва Муҳаммад Шарифзода то 22-юми ноябри имсол дар Боздоштгоҳ мемонанд.

Мурофиа паси дарҳои баста гузашт. Тафсилоташ, аз ҷумла мавқеи гумонзадҳо маълум нест.

Аз ин пеш, рӯзи 16-уми август, Додгоҳи ноҳияи Басманний бо дархости Кумитаи тафтишоти Русия муҳлати ҳабси Муҳаммадсобир Файзов, Далерҷон Мирзоев, Муродалӣ Раҷабализода ва Шамсидини Фаридунро ҳам то 22-юми ноябр дароз кард.

Ин афрод аз моҳи марти имсол дар ҳабс ҳастанд.

Ҳамла ба "Крокус Сити Ҳолл" дар наздикии Маскав дар шаби 22-юми марти имсол сурат гирифт. Мақомоти Русия гуфтанд, дар ин ҳодиса 144 нафар ҷон бохта, беш аз 500 кас осеб диданд.

Гурӯҳи тундрави "Давлати исломӣ" ё ДОИШ масъулияти ҳамларо ба дӯш гирифт, вале баъзе аз мансабдорони Русия ангушти иттиҳомро ба тарафи Украина дароз карданд. Киев даст доштанашро дар ҳодиса инкор кард.

Додгоҳи ноҳияи Басманнийи шаҳри Маскав то кунун беш аз даҳ нафар, аз ҷумла шаҳрвандон ва зодагони Тоҷикистонро ба гумони даст доштан дар ҳамла ба “Крокус Сити” ба ҳабс гирифт. Шиканҷаи ошкори боздоштшудаҳо таҳқиқи мунсифонаи қазияро зери суол бурдааст.

Чанд шаҳрванди боздоштшудаи Тоҷикистон ба зидди қарори додгоҳ шикоят карда, худро расман бегуноҳ донистанд. Додгоҳ дархости онҳоро барои бозбинии парванда напазируфт

Муҳоҷирони тоҷик мегӯянд, пас аз ҳамла санҷишу боздошт ва ихроҷ афзуда, муносибати мардуму корфармоён бо онҳо дар Русия тағйир ёфтааст.

Шаҳрвандони боздоштшудаи Тоҷикистон, ки муҳлати ҳабсашон то моҳи ноябр дароз шуд:

МУҲАММАДСОБИР ФАЙЗОВ

Муҳаммадсобир Файзови 19-соларо рӯзи 23-юми марти имсол дар Русия дастгир карда, бо аробаи маъюбӣ ва либоси тиббӣ ба Додгоҳи ноҳияи Басманний оварданд. Пеш аз он дар шуъбаи эҳё буд ва бозпурсияш дар он ҷо гузашт. Ҳангоми амалиёти боздошт як чашмаш осеб дидааст.

Сайрам Файзова, модари Муҳаммадсобир Файзов, моҳи марти имсол ба Радиои Озодӣ гуфт, ҳеч бовараш намеояд, ки фарзандаш ҳамлаи террористӣ анҷом додааст. "Писарам шахси мазҳабӣ набуд, намозро ҳам соз намехонд, қазо мекард," -- нақл карда буд ӯ.

Дар аксу наворҳояш дар шабакаи иҷтимоии "ВКонтакте"-и русӣ Муҳаммадсобир Файзов гоҳе бо риш ва дар бархе маврид бидуни риш ҷавони шод ва коргари хуб тасвир ёфтааст. Аз миёни аксу наворҳои гузоштаи ӯ саҳнаҳое аз кораш бо муштариҳои рус, маҳалли кор, мошинсаворӣ ва наворҳои кӯтоҳ бо мусиқӣ низ дида мешаванд. Баъзе аз расонаҳои Русия нигоштанд, ки ӯ ба варзиш ҳам рағбат дошт ва дар толори варзишии War Pro дар Иваново дар дарсҳои кикбоксинг ширкат кардааст.

ДАЛЕРҶОН МИРЗОЕВ

Далерҷон Мирзоеви 32-сола аз деҳаи Галахонаи ноҳияи Рӯдакӣ рӯзи 23-юми марти имсол дар Брянск боздошт шуд. Дар наворе дар шабакаҳои иҷтимоӣ, ки иддао мешавад лаҳзаи боздошти Мирзоев аст, ӯро аз болои як дарахт ба поин фароварда, сипас ба дастонаш завлона мезананд.

Ба нақли наздиконаш, ӯ шаш моҳ пеш аз ҳодиса ба Русия рафта, дар хонаи амакбачааш дар Новосибирск мезист ва таксӣ меронд. Дар Тоҷикистон низ ба таксиронӣ машғул будааст.

Модараш, Гулракат Мирзоева, гуфта буд, ки бовар надорад, ӯ дар ҳодисаи террористӣ даст дошта бошад.

САИДАКРАМ РАҶАБАЛИЗОДА

Мақомоти Русия Саидакрам Раҷабализодаро рӯзи 23-юми март дастгир карда, дар аввал барои ду моҳ (то 22-юми май) ба ҳабс гирифта буданд. Ҳамсараш Бибисоро Ашӯрова ба Радиои Озодӣ гуфт, ӯ дар аввали моҳи январи имсол барои кор ба Русия рафт, аммо "тақрибан се моҳ на занг зад, на суроғ кард ва на пул фиристод".

Манобеи амниятии Туркия ба нашрияи “Ҳуррият”-и ин кишвар гуфта буданд, ки Саидакрам Раҷабализода 5-уми январи имсол вориди Истанбул шуда, 2-юми март якҷо бо Фаридуни Шамсиддин, гумонбари дигари ҳамла ба "Крокус", ба Русия рафт.

Саидакрам Раҷабализода то замони ба Русия рафтан дар корхонаи мебелсозӣ дар шаҳри Ваҳдат кор мекард. Ҳамсараш мегӯяд, "ӯ кӯшиш дошт як мошини “Опел” харида, дар ҳамин ҷо монад ва ба кораш идома диҳад.”

Ҳамдеҳагон ва ҳам наздиконаш гуфтанд, Раҷабализода намоз мехонд, аммо дар ягон ҷо таълими динӣ нагирифта буд. Бибисоро Ашӯрова мегӯяд, “мактаби миёнаро то синфи 9-ум хондааст. Дигар дар ягонҷо таҳсил накарда набуд. Гоҳ намоз мехонд, гоҳ намехонд.”

ФАРИДУНИ ШАМСИДДИН

Мақомоти Русия мегӯянд, номи Фаридуни Шамсиддини 25-сола дар "рӯйхати террористон ва ифротгароён" дар ин кишвар сабт шудааст. Аз шаҳри Ҳисор аст. Рӯзи 23-юми март дастгир карданд.

Дар навори бозпурсии мақомоти Русия Фаридуни Шамсиддин дар ҳоле ки дастонаш баста ва дар замин ба зону зада буд, гуфт, барои иҷрои ҳамлаи террористӣ аз ёвари як рӯҳонӣ “500 ҳазор рубл” гирифт. Баъзе аз корбарони шабакаҳои иҷтимоӣ ва коршиносон ба дурустии он шубҳа карданд.

Шабакаҳои русӣ дар Телеграм рӯзи 23-юми март акси шиканҷа шудани ӯро бо барқ нашр карданд. Бахши русии Радиои Озодӣ дар як таҳқиқот бо такя ба саҳифаҳои Фаридуни Шамсиддин дар шабакаҳои маҷозӣ маълум кардааст, ки ӯ чанд аксе аз ҳузураш дар Истанбули Туркия нашр карда ва номашро дар бархе шабакаҳои маҷозӣ Абдулло гузоштааст.

Фаридуни Шамсиддини дар соли 2014, замони таҳсил дар синфи 7-уми як мактаби миёнаи Ҳисор бо гумони озори ҷинсии ноболиғи 6-сола боздошт ва шаш сол зиндонӣ шудааст. Соли 2020 аз зиндон раҳо ва пас аз ду сол оиладор шуд. Ҳоло як тифли даҳмоҳа дорад. То рафтан ба Русия дар шаҳри Ҳисор дар нонвойхонае кор мекардааст.

Хешовандони Фаридуни Шамсиддин дар деҳаи Лойоба мегӯянд, пас аз раҳо шудани аз зиндон дар рафтору кирдори ӯ амалкардҳои ғайриинтизореро мушоҳида накарда буданд.

ЛУТФУЛЛОИ НАЗРИМАД

Мақомоти тафтишотии Русия алайҳи ин шаҳрванди Тоҷикистон бар асоси моддаи "анҷоми амали террористӣ дар ҳайати гурӯҳи созмонёфта, ки боиси марги инсон шудааст" парванда боз кардаанд.

Баъзе аз расонаҳои Русия қаблан навишта буданд, ки ӯ як рӯз баъди ҳамла дар "Крокус Сити Ҳолл"-и Маскав барои дағалӣ бо полис боздошт ва дертар гуё рабт доштанаш ба ҳодиса собит шудааст. Азбаски он замон мурофиа паси дарҳои баста гузашта буд, мавқеи худаш маълум набуд. Дар зодгоҳаш ба дурустии он шубҳа доранд.

Хабарнигорони Радиои Озодӣ барои суҳбат бо наздикони Лутфуллои Назримад ба ноҳияи Панҷ рафтанд, аммо онҳоро наёфтанд. Ҳамсояҳои ин ҷавон гуфтанд, ӯ мактабро бо баҳои аъло хатм кардааст ва ба иттиҳоми эълоншуда нисбат ба ӯ дар Русия бовар надоранд. Вай тобистони соли гузашта Донишгоҳи шаҳри Бохтарро хатм карда, барои ҷустуҷӯйи кор ба Русия рафтааст.

Лутфуллои Назримад фарзанди калонии Назримад Ҳаётов, корманди идоари фарҳанги ноҳияи Панҷи вилояти Хатлон, будааст. Ба гуфтаи наздиконаш, падари хонадон ӯро барои кор ба Русия фиристода буд, то бо мадади писараш соҳиби манзил шаванд.

ҶУМЪАХОН ҚУРБОНОВ

Ҷумъахон Қурбонови 21-сола рӯзи 27-уми апрел бо қарори додгоҳи Басманнии шаҳри Маскав ва ба гумони “маблағгузорӣ барои омодагӣ ба ҳамлаи террористӣ” ба ҳабс гирифта шуд.

Манзили волидони Ҷумъахон Қурбонов дар ҷамоати Хуросони ноҳияи Фархори вилояти Хатлон ҷойгир аст. Модараш омӯзгор аст, падараш деҳқонӣ мекунад. "Бо саводи худаш ба Донишгоҳи омӯзгорӣ дар Душанбе дохил шуда буд. Зӯрамон нарасид, ки пули иҷора ва харҷҳои дигарашро диҳем. Ночор барои пулкоркунӣ ба Русия рафт," – нақл кард Бегиёр Саидов, падари Ҷумъахон, рӯзи 6-уми май ба Радиои Озодӣ.

Ӯ афзуд, Ҷумъахон ҳамроҳи бародараш, Сӯҳроб Қурбонов, дар як макон дар пойтахти Русия зиндагӣ ва дар сохтмон кор мекарданд. Ҳар моҳ барои харҷи оила то 20 ҳазор рубли русӣ ё зиёда аз дусад доллари амрикоӣ мефиристодааст. "Ман ба бегуноҳии фарзандам бовар дорам," -- гуфт Саидов ва афзуд, “ба иттиҳоми эълонкардаи мақомот дар Русия бовар надорем. Пайваста насиҳаташ мекардам, ки танҳо ба роҳи рост рав.”

ЁҚУБҶОН ЮСУФЗОДА

Кумитаи тафтишотии Русия Ёқубҷон Юсуфзодаро ба он муттаҳам кард, ки чанд рӯз пеш аз ҳамла барои таъмини гумонбарон бо ҷой "тавассути корти бонкӣ ба як шарикаш пул фиристодааст".

Муфаттишон гуфтаанд, як қисми пул "баъд аз содир шудани ҷиноят ба ҳисоби яке аз ҳамлаварон гузаронда шуд." Тасдиқи он аз манобеи дигар имконпазир нест. Назари худаш ё наздикону вакили мудофеъ ва ҷузъиёти парванда дастрас нест.

Саҳифаи "Маш" дар Телеграм нигоштааст, ки Ёқубҷон Юсуфзода ҳангоми амалиёти “Нелегал” ва тасодуфан рӯзи 26-уми март дастгир шуда, сипас робитааш бо ҳамлаварон ошкор гаштааст.

Ба иттилои дарёфтии Радиои Озодӣ, Ёқубҷон Юсуфзода 25 сол дорад, оиладор ва соҳиби се фарзанд. Ҳангоми боздошт дар сохтмон кор мекардааст.

МУҲАММАД ШАРИФЗОДА

Додгоҳи ноҳияи Басманнии шаҳри Маскав рӯзи 5-уми апрел дастури ҳабси Муҳаммад Шарифзодаро содир кард. Ӯ ба "амали террористӣ" муттаҳам аст, вале ба сабаби пӯшида будани мурофиа назари ӯ ё вакили мудофеаш дастрас нест.

Теъдоди қурбониёни селу обхезӣ дар аёлати Техаси Амрико ба 82 нафар расидааст ва дар миёни онҳо 28 нафар кӯдакону наврасонанд.

Теъдоде аз ин наврасон дар як урдӯгоҳи масеҳиён будаанд, ки дар соҳили рӯдхонаи Гуадалупа қарор дорад. Камаш 10 духтар ва раҳбари гуруҳи онҳо аз ҷумлаи онҳоеанд, ки бенишон шудаанд ва ҷустуҷӯи онҳо идома дорад.

Шаби 4-уми июл борони зиёд сабаби селу обхезӣ дар рӯдхонаи Гуадалупа шуд ва бино ба гузоришҳо сатҳи оби он дар 45 дақиқа то 8 метр боло рафтааст.

Доналд Трамп, раиси ҷумҳури Амрико гуфт, ки ҳукумати марказӣ кӯмак ба аёлати Техасро идома хоҳад дод ва мумкин аст, худи ӯ рӯзи панҷшанбе ба ин аёлати осебдида сафар кунад.

Қарор аст, фардо 8-уми июл Содир Ҷабборов, раиси ҷумҳури Қирғизистон бо сафари давлатӣ ба Тоҷикистон сафар кунад. Дар ин бора имрӯз дар канали расмии Рустами Эмомалӣ, раиси шаҳри Душанбе ва раиси Маҷлиси миллӣ хабар додааст.

Ҷузъиёти сафарро нагуфтаанд, вале хабаргузории “Ховар” рӯзе пештар навишт, ки рӯзҳои 7-8 июл дар шаҳри Душанбе Форуми соҳибкорони Тоҷикистону Қирғизистон баргузор мешавад. Ду тараф, ки солҳо боз ҳамкориҳои иқтисодии дурусте надоштанд, имконоти тиҷорату додугирифт байни ҳамдигарро баррасӣ мекунанд.

Тоҷикистон ва Қирғизистон, ки даҳсолаҳо наметавонистанд сарҳади байни ду кишварро таъйину аломатгузорӣ кунанд ва дар зарфи чаҳор соли гузашта ду бор бо ҳам сахт ҷангиданд, моҳи марти имсол созишномаи марзиро имзо карданд. Баъди ин гузаргоҳҳои бастаи марзӣ барои мардуми ду тараф, ки солҳо байни ҳам тиҷорату муомила доштанд, боз шуд.

Вазорати умури хориҷии Русия гуфтааст, ки аз аввали имсол то кунун бештар аз 26 ҳазор патент ва иҷозаномаи кории хориҷиён ва ё ҳамон муҳоҷирони кориро барои огаҳ накардан аз ҷойи корашон беэътибор кардааст.

Хабаргузории давлатии ТАСС рӯзи 3-уми июл аз қавли ин вазорат хабар додааст, ки теъдоди патентҳои беэътиборшуда дар соли равон дар муқоиса ба соли гузашта ҳафт баробар зиёдтар аст. Бар асоси муқаррарот дар Русия муҳоҷироне, ки бар асоси патент кор мекунанд, бояд дар муддати ду моҳ ба шӯъбаи корҳои дохилӣ дар маҳалли худ хабар бидиҳанд, ки дар куҷо кор мекунанд.

Дар Русия садҳо ҳазор муҳоҷири тоҷик бар асоси патент кор мекунанд ва зоҳиран теъдоди санадҳои беэътиборшудаи онҳо низ кам нест. Дар ин кишвар дар як соли ахир даҳҳо қонуну санадҳои нав барои маҳдуд кардани фаъолияти муҳоҷирон қабул карданд, чун ба қавли теъдоде аз сиёсатмадорони рус муҳоҷирон дигар барои ин кишвар “як дарди сар шудаанд.

Ҳомиёни ҳуқуқ мегӯянд, пайваста матраҳ кардани мушкилоти муҳоҷирон дар матбуот ва доираҳои давлатӣ дар Русия як талош барои ба самти дигар кашидани афкори умуми ҷомеа аз мушкилоти фаровони дохилӣ ва ҷанги вайронгари Русия дар Украина аст.

Вазорати нақлиёти Русия хабар додааст, ки шоми 6-уми июл қариб 400 парвоз аз фурудгоҳҳои "Шереметово"-и Маскав, "Пулково"-и Санкт-Петербург ва "Чкалов"-и Нижегород бекор ё ба таъхир афтоданд.

Ба иттилои манбаъ, сабаби пеш омадани ин вазъ ҳамлаи паҳподҳо аз Украина аст. Вазорати нақлиёти Русия иддао кардааст, ки вазъият зери назорат буда, ширкатҳои ҳавопаймоӣ тавони расидагӣ ба мушкилро доранд.

Ба гузориши расонаҳои русӣ, шаҳрвандон маҷбур шудаанд барои сафар аз Санкт-Петербург ба Маскав аз қатора истифода баранд. Билети қатора дар ин масир камёфт шудааст.

Коршиносон дар суҳбат бо нашрияи "Коммерсант" гуфтаанд, чунин ҳолат, яъне бекор ё ба таъхир афтодани парвозҳо метавонад барои ширкатҳои ҳавопаймоӣ қариб 20 миллиард рубл зарар расонад.

Вазорати дифои Русия хабар додааст, ки рӯзи якшанбе 48 паҳпод ё дрони Украиниро нобуд кардаанд.

Дар ҳамин ҳол таблои Фурудгоҳи Душанбе ҳам субҳи 7-уми июл нишон медиҳад, ки дастикам се парвоз аз шаҳрҳои Маскав ва Санкт-Петербург ба пойтахти Тоҷикистон ба таъхир афтодаанд.

Илон Маск, миллиардер ва муттаҳиди пешини президент Доналд Трамп, аз таъсиси ҳизби нав дар Амрико хабар дод.

Маск шоми 5-уми июл дар шабакаи X (Твиттер) навишт, "имрӯз Ҳизби Амрико ташкил шуд, то озодии шуморо ба шумо бозгардонем."

Аммо миллиардер дар бораи ташкили ҳизби нав ва сабти расмии он чизе нагуфтааст.

Маск, сарватмандтарин шахси ҷаҳон 4-уми июл дар Рӯзи истиқлолияти Амрико дар шабакаи X навишт, "рӯзи истиқлол замони муносиб аст то пурсида шавад, оё хоҳони истиқлол аз низоми дуҳизбӣ (ба гуфтаи бархеҳо яккаҳизбӣ) ҳастед ё не?"

Ба гуфтаи Илон Маск, дар ин назарсанҷӣ 1,2 миллион кас ширкат карда, бештари онҳо ба таъсиси ҳизби нав дар Амрико посухи мусбат додаанд.

Илон Маск хабари таъсиси ҳизби худро як рӯз пас аз он эълом кард, ки Доналд Трамп қонун дар бораи коҳиши молиёт ва хароҷотҳои давлатии Амрикоро имзо кард. Илон Маск яке аз мунтақидони сарсахти ин қонун буд ва онро “харобкорона” номид. Доналд Трамп рӯзи 1-уми июл пешниҳод кард, ки идораи муассирияти кори ҳукумат (Department of Government Efficiency - DOGE) имтиёзҳои барои ширкатҳои Илон Маск додашударо бозбинӣ кунад.

Илон Маск рӯзи 30 май маъмурияти Трампро тарк кард. Он ҷо ӯ давоми 130 рӯз раҳбарии идораи муассирияти кори ҳукумат (DOGE)-ро раҳбарӣ мекард. Ин идораро бо мақсади кам кардани хароҷоти ҳукумат таъсис дода буданд. Вале баъди рафтан аз кори давлатӣ, миёни Илон Маск ва Доналд Трамп баҳсҳои лафзӣ сар зад.

Оятуллоҳ Алии Хоманаӣ, раҳбари олии Эрон, ки аз замони ҳамлаи Исроил ба Эрон дар маҳзари ом дида намешуд, дар як маросими азодорӣ ширкат кардааст.

Расонаҳои давлатии Эрон шоми 5-уми июл наворе пахш карданд, ки дар он дида мешавад, ки Алии Хоманаӣ дар як маросими азодории Ошуро ҳузур дорад.

Рӯзи 13-уми июн Исроил ба Эрон ҳамла кард ва аз он вақт Алии Хоманаӣ дар маҳзари ом дида намешуд. Ӯ давоми се ҳафтаи ахир танҳо се паёми видеоӣ нашр кард.

Пеш аз ин Доналд Трамп, президенти Амрико дастикам ду бор гуфта буд, ки монеи кушта шудани Алии Хоманаӣ шудааст. Трамп дар ҷараёни ҳамлаи Исроил ба Эрон гуфта буд, аз ҷойи роҳбари Ҷумҳурии исломӣ огоҳ аст, аммо қасди куштани ӯро надорад.

Президент Доналд Трамп баъди суҳбат бо ҳамтои украиниаш Владимир Зеленский гуфт, Украина барои ҳимояи худ ба низоми дифои ҳавоии Patriot эҳтиёҷ дорад.

Трамп 5-уми июл ба хабарнигорон гуфт, "бо Зеленский гуфтугӯи хуб доштем."

Хабарнигорон аз Доналд Трамп пурсиданд, ки оё Амрико барои Украина боз низоми дифои ҳавоии Patriot медиҳад? Раиси ҷумҳури Амрико дар посух ба ин суол танҳо гуфт, "онҳо барои мудофиа худ ба ин чиз эҳтиёҷ доранд... Онҳо зери ҳамлаҳои шадид қарор доранд ва ба чизе ниёз доранд, ки худро ҳимоя кунанд."

Ахиран Вазорати дифои Амрико интиқоли чанд намуд таҷҳизоти низомӣ, аз ҷумла мушак барои системаи Patriot-ро ба Украина қатъ кард. Ин кор нигаронии Киевро ба миён овард. Олмон барои хариди низоми дифои ҳавоии Patriot барои Украина, бо Вашингтон музокира дорад. Тасмими ниҳоӣ дар ин бора гирифта нашудааст.

Тобистони имсол Тоҷикистон дар миёни панҷгонаи кишварҳое қарор гирифтааст, ки шаҳрвандони Русия барои тамошо ва истироҳат интихоб кардаанд.

Хабаргузории давлатии ТАСС рӯзи 4- уми июл бо такя ба таҳқиқот дар бораи саёҳати шаҳрвандони Русия дар моҳҳои июл ва августи имсол навишт, ки шаҳрвандони Русия барои тамошову саёҳат аз ҳама зиёдтар ба Ҷопону Қибрис ва Вйетнам мерафтаанд ва баъдан ба Тоҷикистону Арманистон.

Сабаби интихоби ин кишварҳо ба навиштаи хабаргузорӣ наздикии кишвар, парвозҳои мустақим ва низоми бераводид байни Тоҷикистону Русия аст. Мақомоти Тоҷикистон мегӯянд, ки танҳо соли гузашта 335 ҳазор шаҳрванди Русия барои сайру саёҳат ба Тоҷикистон омадааст.

Шаҳрвандони Русия, ки асосан ба Туркия ва кишварҳои аврупоӣ барои саёҳату истироҳат мерафтанд, баъди оғози ҷанги Русия дар Украина аз ин имконот маҳрум шуданд, чун парвозҳои мустақим байни бисёре аз кишварҳои Аврупо бо Русия қатъ шуд ва ба шаҳрвандони Русия ҳам ба мушкилӣ раводид медиҳанд.

Гуруҳи фаластинии "Ҳамос" эълон кард, ки ба тарҳи оташбаси Ғазза бо миёнаравии Амрико "бо руҳияи мусбат" посух додааст ва омодааст, то фавран музокирот дар мавриди иҷрои ин созишро оғоз кунад.

"Ҳамос" дар баёнияе, ки шоми 4 июл нашр шуд, дар бораи қабул ё ради тарҳи пешниҳодии Амрико ба таври возеҳ сухан нагуфтааст. "Ҳамос"-ро Амрико ва Аврупо созмони террористӣ қаламдод мекунанд.

Дар баёнияи "Ҳамос" омадааст, ки "пас аз баррасиҳои дохилӣ ва ҳамчунин бо дигар гурӯҳҳои фаластинӣ", посухи дорои "руҳияи мусбат" ба миёнаравҳо додааст.

"Ҳамос" айни замон таъкид кардааст, ки омода аст, то фавран вориди даври нав аз музокирот дар бораи шеваи амалӣ шудани ин тарҳ шавад.

Хабаргузории "Рейтерз" ба нақл аз расонаҳои исроилӣ гузориш додааст, ки мақомоти Исроил посухи "Ҳамос"-ро дарёфт кардаанд ва дар ҳоли баррасии ҷузъиёти он ҳастанд.

Президенти Амрико Доналд Трамп бо пешниҳоди оташбаси 60-рӯза, шомгоҳи панҷшанбе гуфт, интизор дорад, ки Исроил ва "Ҳамос" давоми 24 соати оянда посухи худро ироа кунанд.

Бенямин Нетаняҳу, нахуствазири Исроил, ки қарор аст рӯзи 7 июл дар Кохи Сафед бо Трамп дар Кохи Сафед дидор кунад, ҳанӯз дар мавриди изҳороти президенти Амрико изҳори назар накардааст. Ӯ чанд рӯз пеш гуфт, ки "мо мехоҳем гаравгонҳоро озод кунем".

Дар ҳамин ҳол, расонаҳо ба нақл аз манбаъҳои худ гузориш додаанд, ки "Ҳамос" хоҳони "тағйироти ҷузъӣ" дар тарҳи пешниҳодии оташбас аст. Як мақоми фаластинӣ ба "Рейтерз" гуфтааст, ки "нигарониҳое дар бораи кӯмакҳо, гузаргоҳи Рафаҳ ва шаффофият дар мавриди замони хуруҷуи нерӯҳои исроилӣ, вуҷуд дорад".

Гурӯҳи "Ҷиҳоди исломӣ", муттаҳиди "Ҳамос" низ гуфтааст, ки аз музокироти оташбас ҳимоят мекунад, аммо хостори "замонатҳо"-е аст, ки Исроил пас аз озодии гаравгонҳо, ҳамла ба Ғаззаро дигарбора оғоз накунад.

Ҷузъиёти тарҳи мавриди ҳимояти Амрико ба таври расмӣ эълон нашудааст, аммо расонаҳо ба нақл аз манбаъҳои худ, ба баъзе аз нуқтаҳои он ишора кардаанд.

Хабаргузории "Франс-пресс" ба нақл аз як манбаи фаластинии ошно бо музокирот гузориш дод, ки ин тарҳ шомили "оташбаси 60-рӯза аст, ки тайи он "Ҳамос" ниме аз асирони зиндаи исроилӣ дар Ғаззаро (ҳудуди 10 нафар) дар ивази раҳоии шуморе аз зиндониён ва боздоштшудаҳои фаластинӣ", озод хоҳад кард.

Хабаргузории "Рейтерз" низ ба нақл аз як мақоми огоҳ гузориш дод, ки ин тарҳ шомили озодии 10 гаравгони зинда ба ҳамроҳи ҷасадҳои 18 гаравгони дигар тайи оташбаси 60-рӯза аст.

Дар ҳамлаи "Ҳамос" ба Исроил дар рӯзи 7-уми октябри соли 2023, 1200 нафар исроилӣ кушта ва 251 тан ба гарав гирифта шуданд.

Аз замони оғози ҷанг ва дар пайи ҳамлаҳои Исроил ба Ғазза, беш аз 56 ҳазор фаластинӣ кушта шудаанд, ки аксари онҳо занон ва кӯдакон мебошанд. Мақомоти тандурустӣ дар Ғазза мегӯянд, ки беш аз 100 ҳазор нафар ҳам захмӣ ва ҳазорон тани дигар дар зери вайронаҳо нопадид ҳастанд.

Як кӯдаки шашмоҳа, ки аз сӯи модараш бо зарби корд захмӣ шуда буд, дар бемористони ноҳияи Шаҳритус фавтидааст.

Як масъул дар ҳукумати ноҳияи Қубодиён гуфт, ки субҳи 5 июл Хадича Ҳомидова ба хок супурда шуд. Ба гуфтаи манбаъҳои Радиои Озодӣ, Хадиҷа Ҳомидова аз ноҳияи шикам, болои китф ва дасташ, се корд хӯрда буд.

Табибон қаблан гуфта буданд, ки Хадиҷа Ҳомидова дар бахши эҳёгарии беморхонаи ноҳияи Шаҳритус қарор дорад.

Ҳодисаи ба корд захмӣ кардани кӯдакон дар ҷамоати деҳоти Вокпанти ноҳияи Қубодиён рӯзи 21-уми июн рух дод ва мақомот модари онҳо Юлдуз Бозороваи 24-соларо боздошт кардаанд.

Сабаби ба корд захмӣ кардани кӯдакон маълум нест. Гуфта мешавад, ки кӯдакон Муҳаммадҷони 5-сола, Исои 4-сола ва Ҳадиҷаи 6-моҳа аз оилаи Ҳомидовҳо, сокинони деҳаи Қизилнишони ноҳияи Қубодиён будаанд.

Феълан назари хонаводаи кӯдакон ва зани боздоштшуда маълум нест, вале як сокини деҳа ба Радиои Озодӣ гуфт, ки Юлдуз Бозорова як кӯдакро дар гаҳвора ва ду нафари дигарро дар рахти хоб захмӣ кард. Модари кӯдакон рӯзи ҳодиса аз сӯи мақомоти интизомӣ боздошт шуд.

Як ҳамсуҳбати Радиои Озодӣ аз деҳаи Қизилнишон гуфт, ки оилаи онҳо баҳс ё мушкили хонаводагӣ надошт ва падари кӯдакон хонаҳои мардумро таъмир мекард ва зиндагии осуда дошт.

Хабарҳои ғайрирасмӣ ин аст, ки ҳолати равонии ин зан хуб набудааст.

Феълан назари Умедҷон Ҳомидов, падари кӯдакон ва наздикони Юлдуз Бозорова, ки дар боздоштгоҳ аст, маълум нест.

Оҷонси байналмилалии энержии атомӣ расман эълон кард, ки гуруҳи бозрасони ин созмон аз Эрон берун шудааст.

Ин ниҳод рӯзи 4 июл дар паёме дар шабакаи Х хабар дод, ки бозрасонаш, ки давоми 12 рӯз ҳамлаҳои Исроил дар Теҳрон ҳузур доштанд, "сиҳат ва саломат" аз Эрон берун шудаанд.

Ҷумҳурии исломӣ аз қабл дастрасии бозрасони Оҷонси байналмилалии энержии атомиро маҳдуд карда буд ва ин гурӯҳ аз бозрасони Оҷонс, ки ахиран Эрон тарк карданд, иҷозаи вуруд ба таъсисоти ҳастаӣ барои арзёбии дақиқи хисороти бархоста аз ҳамлаҳои ҷанги 12-рӯзаро надоштанд.

Ин ниҳод ба нақл аз раиси худ Рафаэл Гросси дар идомаи паёмаш таъкид кардааст, ки ростозмоии фаъолиятҳои Эрон ва назорат бар ин фаъолиятҳо "аз аҳамияти муҳиме бархӯрдор аст".

Хабари хуруҷи бозрасони Оҷони байналмилалии энержии атомӣ аз Эрон ду рӯз пас аз он нашр мешавад, ки Масъуд Пизишкиён, раисҷумҳури Ҷумҳурии исломӣ қонуни "Боздоштани ҳамкорӣ бо Оҷонси байналмилалии энержии атомӣ"-ро имзо кард.

Амрико дар вокуниш ба ин тасмими Эрон, онро ғайри қобили қабул хонд.

Созмони ҷаҳонии тандурустӣ (WHO) аз кишварҳо хостааст, давоми 10 соли оянда, андоз ё молиёт бар нӯшиданиҳои ширин, алкулӣ ва маҳсулот аз тамокуро 50 дарсад зиёд кунанд. Ин амр ҳам даромади бахши беҳдошти умумиро афзоиш медиҳад ва ҳам истеъмоли ин маводи зарароварро коҳиш хоҳад дод.

Ба гуфтаи Созмони ҷаҳонии тандурустӣ, ин дархост дар аввали моҳи июл дар нишасти Созмони Милал дар Испания садо дод. Ҳадаф он аст, ки то соли 2035 як триллион доллар даромад аз тариқи андозҳои тандурустӣ ҷамъоварӣ шавад.

Ин созмон мегӯяд, ки истеъмоли нушобаҳои ширин, алкулӣ ва тамоку иртиботи мустақиме бо бемориҳое монанди диабет ва бархе саратонҳо дорад. Намояндагони Созмони ҷаҳонии тандурустӣ гуфтаанд, дар замоне, ки кумакҳои байналмилалӣ коҳиш ёфта, қарзҳои кишварҳо афзоиш ёфтааст, даромади ба дастомада аз ин молиёт метавонад барои тақвияти системаҳои тандурустии кишварҳо истифода шавад.

Тедрос Гебрейесус, раиси Созмони ҷаҳонии тандурустӣ гуфт, ки ин молиёт ба кишварҳо кӯмак мекунад то бо "воқеияти нав" созгор шаванд ва хароҷоти ин бахшро таъмин кунанд.

Рӯзи 4 июл дар шаҳри Хонкендии Озарбойҷон мулоқоти президентони Тоҷикистон ва Эрон – Эмомалӣ Раҳмон ва Масъуди Пизишкиён барпо шуд. Ин аввалин дидори ду раҳбар ва ҳайатҳои ҳукуматии кишварҳо баъди ҷанги 12-рӯзаи Исроилу Эрон мебошад, ки дар ҳошияи ҷаласаи сарони кишварҳои узви Созмони ҳамкориҳои иқтисодӣ (СҲИ) мебошад.

Тоҷикистон дар низои моҳи июн дар Ховари Миёна аз Эрон пуштибонӣ ва ҳамлаҳои ИМА ва Исроилро интиқод кард. Сомонаи президент навишт, “Дар робита ба ҳодисаҳои ахири дар кишвари дӯст рухдода, ҳамдардии самимии Сарвари давлат ва мардуми Тоҷикистон ба кулли мардуми бародари Эрон иброз гардид”.

Каме дертар дар ҷараёни ҷаласаи СҲИ Раҳмон бо ёдоварӣ аз вазъ дар Ховари Миёна гуфт, ки Тоҷикистон "ҷонибдори коҳиши шиддатнокии вазъ ва барқарорсозии сулҳи пойдор дар Ховари Миёна танҳо бо роҳҳои сиёсиву дипломатӣ мебошад".

Ба навиштаи сомонаи президенти Тоҷикистон, ҳайатҳо ҳамкории ду кишварро баррасӣ карданд. Президенти Раҳмон гуфтааст, Тоҷикистон “ба таҳкиму густариши беш аз пеши робитаҳои гуногунҷанба бо Ҷумҳурии Исломии Эрон алоқаманд мебошад”. Ҷонибҳо ба зарурати идомаи ҳамкориҳо аз рӯи мувофиқаҳои гузашта таъкид кардаанд.

“Фаъолияти Неругоҳи обии Сангтуда-2 ва ҳалли босамари масъалаҳои марбут ба он намунаи неки ҳамкории Тоҷикистону Эрон арзёбӣ гардид”, омадааст дар хабар.

Душанбеву Теҳрон дар даҳ соли охир робитаи печидае доштанд. Тоҷикистон Эронро ба ҳимоят аз исломиёни мухолифи давлат муттаҳам мекард. Қарзи "Барқи тоҷик" аз нерӯгоҳи "Сангтӯда-2" ва сарнавишти пулҳои тоҷири эронӣ Бобаки Занҷонӣ, баҳси дигари тарафҳо буд. Соли 2019, пас аз имзо шудани санаде, робитаҳои ду кишвар тағйир ёфт ва рӯ ба гармӣ овард. Тоҷикистон дар садади истифодаи роҳҳои иртиботии Эрон ба хотири истифода аз бандари Чобаҳор аст.

Тоҷикистон ва Эрон моҳи феврали имсол раводид барои шаҳрвандони ҳамдигарро бекор карданд. Миёни Тоҷикистон ва Эрон феълан ҳафтае се парвоз ҳаст.

Инчунин рӯзи июл дидори президенти Тоҷикистон бо раҳбари Озарбойҷон Илҳом Алиев барпо шуд, ки мизбони ҷаласаи 17-уми СҲИ мебошад.

То 1 июл дар Тоҷикистон 41 ҳолати гирифтории ҳайвоноти хонагӣ ба бемории сӯхтанӣ сабт шудааст. Дар ин бора ба хабаргузории Азия-Плюс Наврӯз Ҷаъфаров, муовини сардори Раёсати бехатарии эпидемиологии Вазорати тандурустии Тоҷикистон хабар додааст.

Ҷаъфаров гуфтааст, ки ба истиснои ВМКБ ва Рашт, ҳолатҳои ошкоршавии бемории сӯхтанӣ (сибирская язва) дар дигар минтақаҳои кишвар сабт шудааст.

Мутахассис ин бемориро як «хатари мавсимие» номидааст, ки огаҳии ҷиддии сокинонро талаб мекунад, чун хатари аз ҷонварон ва инсон гузаштани он вуҷуд дорад.

Ӯ аз ҳама дастандаркорон, аз ҷумла, молдорон, қассобон, байторҳо ва дигарҳо даъват кардааст, ки гову гӯсфандҳои худро таҳти муоина қарор дода, бахусус пеш аз забҳ сиҳҳатии онро аз назар гузаронанд ва вақти куштани мол мутобиқ ба меъёрҳои санитарӣ амал кунанд.

Дар Озарбойҷон рӯзи 4 июл ҷаласаи 17-уми сарони давлатҳои аъзои Созмони ҳамкориҳои иқтисодӣ баргузор мешавад ва дар кори он, аз ҷумла, президенти Тоҷикистон Эмомалӣ Раҳмон ҳам ширкат мекунад. Раҳбари Тоҷикистон субҳи ҷумъа вориди шаҳри Боку шуд. Дар ҷаласаи 17-уми раҳбарони кишварҳои узви СҲИ инчунин мақомоти Афғонистон, Озарбойҷон, Эрон, Покистон, Қазоқистон, Узбекистон, Туркия ва Туркманистон иштирок мекунанд.

Дар иттилоияи расмии ин созмон гуфта шудааст, ки роҳҳои тавсеаи ҳамкориҳои иқтисодӣ дар маркази баррасиҳои ҷаласа қарор мегирад.

Ҷаласаи сарон ду рӯз - рӯзҳои 3 ва 4-уми июл дар шаҳри Хонкендии минтақаи Қаробоғи Озарбойҷон барпо мешавад.

Созмони ҳамкориҳои иқтисодӣ як ташкилоти минтақавии байнидавлатӣ буда, соли 1985 таъсис шудааст. Ба узвияти он Туркия, Покистон, Эрон, Афғонстон, Озарбойҷон, Узбекистон, Қазоқистон, Қирғизистон, Тоҷикистон ва Тоҷикистон шомил ҳастанд.

Ба иттилои расонаҳои мухталиф, дар ҳошияи ин ҷаласа бархе раҳбарони кишварҳо мулоқоти ҷудогонаи худро барпо мекунанд. Аз ҷумла, Ҳинду Покистон гуфтаанд, ки нахуствазирони ду кишвар бояд бо ҳам дидору гуфтугӯ кунанд ва ҳам мақомоти Туркманистон аз дидору гуфтугӯҳои вазири корҳои хориҷии ин кишвар Рашид Мередов ва муовини раиси ҳукумати Толибон Абдулғанӣ Бародар хабар додааст. Ҳамкориҳои энерживу мухобиротӣ мавзӯи марказии ин гуфтугӯҳо будааст.

Дар бораи мулоқотҳои ҳошиявии президенти Тоҷикистон Эмомалӣ Раҳмон феълан хабаре нашр намешавад, вале ба иттилои сомонаи президент, ӯро дар ин сафар вазири корҳои хориҷӣ, ёрдамчиёнаш оид ба робитаҳои хориҷӣ ва масъалаҳои иқтисодӣ, вазирони рушди иқтисоду савдо ва нақлиёт ҳамроҳӣ мекунанд.